Asistèntnan di kushina ta sigui pa siguiente fase

Willemstad, (February 13, 2020) – Djarason último, e partisipantenan di Kla Pa Turismo tabatin nan último dia den kushina na skol promé ku nan drenta nan temporada di treining praktiko den e diferente kompanianan manera e.o. Santa Barbara Beach & Golf Resort, Kura Hulanda Village & Spa, Livingstone Jan Thiel Resort, Papagayo Curaçao, Chogogo Dive & Beach Resort, Curaçao Marriott Beach Resort, Dreams Curacao, Baoase Luxury Resort, Morena Resort Curacao, Restaurant & Café Gouverneur de Rouville i Aan Zee BV.

Pa konmemorá nan ultimo dia den kushina di skol, e partisipantenan a invitá partnernan di Kla Pa Turismo pa un almuerso sukulento kaminda nan a prepará diferente kuminda i desèrt.

Nan a transformá e lokal kreando un ambiente akohido kaminda nan a risibí tur invitado ku un sonrisa amikal. Kada partisipante a prepará un plato ku nan propio karakteristika, kual ta nifiká ku tur invitado a saboriá un plato diferente.

Tabatin platonan ku ta inkluí tenderloin, filèt di galiña i kompaña ku risoto, aros, baked pataoes i bèrdura.Tabatin tambe platonan ku sous na banda o ku piko di gayo agregá. Promé ku a kuminsa, kada partisipante a presentá nan plato na e persona ku ta bai komé i nan tabata habrí pa risibí reakshon i komentario. Na final di e almuerso e partisipantenan a sigui parti desèrt, un eiskrim di kas delisioso i bolo di chukulati i kòfi. Banda di e kuminda i desèrt sukulento, e servisio tabata bon i e sonrisanan di e partisipantenan tabata kaluroso.

Tabata un manera perfekto pa yega na un final di e promé kapítulo di teoria di e programa Kla Pa Turismo. CHATA ta deseá e partisipantenan e mihó deseonan ku nan programa di treining praktiko i mas ku klaro lo keda monitoreá tur partisipante regularmente pa sigurá éksito di kada unu. 

Inskripshon pa e proyekto Kla Pa Turismo ta posibel durante siman na ofisina di CHATA.

Leave a Comment