CHATA ta firma akuerdo di kolaborashon ku SVH.

Un invershon importante den nos hendenan pa ekselensia den servisio.

Willemstad, 5 di febrüari 2020 – Siman pasá, Stichting Vakbekwaamheid Horeca (despues di akí, referí komo SVH) a bishitá nos isla pa ofisialmente finalisá e akuerdo ku CHATA den kuadro di su esfuersonan edukashonal i di treining pa industria di Turismo. Un di e promé proyektonan di CHATA ku lo benefisiá di e kolaborashon akí ta e proyekto di ‘Kla Pa Turismo’.

CHATA i SVH su ophetivo prinsipal ta pa oumentá profeshonalismo den industia di hospitalidat. SVH ta konosí pa su kolaborashonnan ku partnernan den edukashon di hospitalidat i tambe empresarial. SVH ta desaroyá materialnan edukashonal digital i métodonan di duna lès pa edukashon vokashonal, treinernan i tambe  empresarionan.

Nan ta garantisá konosementu dor di kondusí èksamennan i proveé konosementu den e diferente treiningnan pa industria di hospitalidat.  Esaki ta e formula pa krea e konekshon entre edukashon di hospitalidat i mundu empresarial i tambe trese inovashon den e profeshonalismo den sektor. 

CHATA ta orguyoso di por alsa nivel pa medio di e kolaborashon aki di Kòrsou su industria di turismo pa loke ta trata servisio, maneho i standarnan di industria. SVH ta sertifiká pa ISO (International Organization for Standardization) pa desaroyo i publikashon di materialnan i métodonan edukashonal, desaroyo i atministrashon di èksamen i registrashon di graduado i mas. Ta pa e motibu akí nos mester rekonosé e balor i importansia di e akuerdo firmá komo un kontribushon benefisioso i un invershon den nos industria di hospitalidat na Kòrsou i aun mas den nos hendenan lokal.

Resientemente CHATA a lansa e proyekto ‘Kla Pa Turismo’ den novèmber 2019, den kolaborashon ku Miniesterio di Desaroyo Ekonomiko (MEO) i Ministerio di Desaroyo Sosial, Labor i Bienestar (SOAW) i tambe PMO Strategia di Kresementu pa Kòrsou. E proyekto aki lo trein i prepará un máksimo di 300 hende lokal riba nivel basiko pa traha den hospitalidat komo e.o.: asistènt di kushina, asistènt di servisio, asistènt di seguridat den hospitalidat i kamarera. E kursonan ta konsistí di tareanan teoretiko i tambe praktiko i ta konkluí ku un èksamen praktiko. E partisipante lo keda guiá pa dosentenan ekperensiá den e industria i lo kolaborá tambe ku diferente kompanianan den e sektor di turismo i hospitalidat. E kontenido di e programa di asistènt di kushina  asistènt di servisio ta materialnan di SVH ku ta keda duná pa dosentenenan lokal. Lèsnan a kuminsá kaba pa e promé 38 partisipantenan riba 20 di januari 2020. E promé grupo di kamarera konsistiendo di 16 partisipante tambe a kuminsá ku nan kurso riba 3 di febrüari 2020.

Tambe CHATA a fasilitá un seshon di informashon pa su miebronan den kuadro di e posibilidatnan ofresé pa SVH. Miembronan di CHATA i/o kompanianan di treining manera e.o.: Avila Beach Hotel, Kura Hulanda Hotel, Livingstone Jan Thiel Resort, Corendon Mangrove Beach Resort, Papagyo Curacao, Chogogo Resort, Curacao Marriot Beach Resort etc. a risibí informashon ekstenso tokante e servisionan ku SVH ta ofresé i tambe SVH a duna splikashon amplio tokante nan diferente programanan. Mas aleu, nan a duna un demonstrashon ekslusivo di nan plataforma edukashonal digital. Despues di e presentashon, e kompanianan di treining a haña e oportunidat pa hasi pregunta i tambe nan a kompartí nan entusiasmo tantu pa e proyekto ‘Kla Pa turismo’, komo e oportunidat pa risibí e informashon di SVH personalmente. Aparte di e enkuentro akí, SVH a topa tambe ku diferente partnernan di turismo pa diskutí mas posibilidat di kolaborashon. Tambe nan a bishitá un di e lèsnan di Kla Pa Turismo na Marnix College Cas Cora, kaminda nan a duna un charla na e partisipantenan i a keda masha impreshoná ku e interes di esnan ku a skohe pa forma parti di e proyekto.Mas alue, CHATA ta yama un danki kaluroso na Papagayo Curacao, kende a akomodá e representantenan di SVH durante nan estadia di 1 siman.

Leave a Comment