Kla Pa Turismo: Promé 45 persona ta kuminsá ku treining

ENNIA ta spònser 300 seguro di trabou pa partisipantenan

WILLEMSTAD – Djaweps dia 16 di yanüari 2020 a tuma lugá e apertura ofisial di e proyekto ‘Kla pa Turismo’. Durante di un mainta ameno CHATA huntu ku partnernan bou di kua Ministerio di Desaroyo Ekonomiko (MEO), Ministerio di Desaroyo Sosial, Labor i Bienestar (SOAW) i PMO Strategia di Kresementu pa Kòrsou a yama bon biní na e promé 45 partisipantenan di e proyekto Kla Pa Turismo kende lo kuminsá ku lès i treining djaluna awor 20 di yanüari. E apertura a tuma lugá na ENNIA kende ta un miembro di CHATA i tambe e patrosinadónan prinsipal den e proyekto aki.

Sra. Yolene Felipa-Lobato di ENNIA a habri e mainta dunando rekonosementu na e balor i importansia di e último desaroyonan den e sektor turistiko pa nos pais. Ta hustamente pa e motibu aki ENNIA ta kere firmemente den e proyekto di Kla Pa Turismo. P’esei ENNIA a anunsiá públikamente di lo kontribuí ku e proyekto dor di spònser seguro di trabou na tur 300 partisipante durante e trayektoria di Kla Pa Turismo.

Representante di Ministerio di Desaroyo Ekonomiko (MEO) sr. Luelo Girigorie, Minister Hensley Koeiman di Ministerio di Desaroyo Sosial, Labor i Bienestar (SOAW) i sr. Oz Eleonora den representashon di PMO Strategia di Kresementu pa Kòrsou tambe a hasi uso di e oportunidat pa dirigí algun palabra na e partisipantenan presente.

E promé 45 personanan lo kuminsá djaluna próksimo, 20 di yanüari 2020 na Marnix Cas Cora ku e programanan di ‘Asistènt di kushina i ‘Asistènt di servisio’. Siguiente gruponan lo konsistí tambe di programanan di ‘Asistènt di seguridat di hospitalidat’ i tambe ‘Housekeeping’. E kontenido di e programa ta riba nivel básiko i e planifikashon ta derivá for di e sistema di enseñansa di ‘werkend leren’. Maestronan ku eksperensia den sektor i ademas abilidatnan didáktiko lo duna e lèsnan i tambe ta enkargá ku guia den koperashon ku empresanan. E periodo di práktika den kompania ta dura máksimo 5 luna i ta keda klousurá ku un èksamen di práktika. Kompanianan kaminda e partisipantenan lo bai traha i studia bou di guia pa 5 luna ta entre otro: Chogogo Resort, Santa Barbara Beach & Golf Resort, Corendon Mangrove Beach Resort Curacao, Papagayo Curaçao, Hemingway Restaurant, Restaurant Nemo, Restaurant Piazza, Chill Beach Bar & Grill, Restaurant & Café Gouverneur De Rouville, Kura Hulanda Lodge & Beach Club, Morena Resort Curaçao, Oasis Coral Estate Beach, Dive & Wellness Resort, AM Resort, Baoase Luxury Resort i Securitas.

“CHATA huntu ku Gobiernu di Kòrsou ta sumamente orguyoso di por lansa e proyekto akí pa engrandesé nos turismo i tambe yuda personanan ku ta den nesesidat di trabou. Nos ta kontentu di mira karanan entusiasmá i motivá di e generashon hóben i tambe esun mas avansá forma parti di e proyekto aki. Esaki ta netamente loke Kla Pa Turismo ta para p’e.” Sr. Mercera a duna un charla di motivashon ku palabranan di alimentashon na e partisipantenan pa asina inisiá un periodo fruktífero djaluna 20 di yanüari próksimo.

“Dunamentu di servisio ta un tópiko basta prominente den tur e programanan di e proyekto. Sin lugar a duda, Kla Pa Turismo ta pone e importansia di e sektor turístiko den spòtlait. Sinembargo, mirando e desaroyonan positivo ku ta tumando lugá aktualmente den nos sektor, lo mester bai enfoká den futuro pa trese nos sistema edukashonal regular mas serka di e mundu empresarial. Speshalmente pa loke ta trata turismo i hospitalidat” – Miles Mercera, Presidente i CEO di CHATA a klousurá bisando.

Na final di e mainta, CHATA a sorpresá e partisipantenan presente ku un tour di nos isla komo introdukshon na nos produkto turistiko. Un danki speshal ta bai na Irie Tours pa hasi esaki posibel.

E proyekto “Kla pa Turismo” ta parti di un Public-Private-Partnership entre CHATA, Ministerio di Desaroyo Ekonomiko (MEO) i Ministerio di Desaroyo Sosial, Labor i Bienestar (SOAW) i tambe mundu empresarial. E proyekto ta forma parti di Strategia di Kresementu pa Kòrsou.

CHATA kier a yama danki na tur demas partner ku ta yuda hasi Kla Pa Turismo posibel, entre otro: Marnix College Cas Cora, VPCO, ENNIA, Acadamy Hotel Curaçao, Teamwork, Total services, Impacto, Caribbean Projects, Roberto Carlo i demas dosentenen. Inskripshon pa partisipa na e proyekto ta posibel ahinda.

Leave a Comment