Promé evento ‘Kla pa Turismo’ eksitoso

WILLEMSTAD – Djasabra dia 23 di Novèmber a tuma lugá pa promé biaha e evento ‘Kla pa Turismo’ na Marnix College Cas Cora, organisá pa CHATA den kolaborashon ku Ministerio di Desaroyo Ekonómiko (MEO) i Ministerio di Desaroyo Sosial, Labor i Bienestar (SOAW).  Alrededor di 400 persona a akudí na e evento aki, kaminda den transkurso di tempu lo skohe 300 ku lo haña trabou den diferente sektor turístiko. For di 9or di mainta te 5or di atardi personanan interesá pa traha den turismo por a akudí na Marnix College i a risibí informashon tokante vakaturanan disponibel. Durante di e evento aki, tambe nos Junior Chef a keda skohé ku lo forma parti di e tim kulinario di Kòrsou, ku lo representá nos isla den Taste of the Caribbean na Miami den e aña benidero.

“Nos ta sumamente satisfecho di por a organisá e evento aki pa engrandesé nos turismo i tambe juda personanan ku ta den nesesidat di trabou. Tabata un dia kaminda nos a mira karanan nobo di e generashon hoben i e generashon mas avansá, informando nan mes ku gran entusiasmo tokante e trabounan disponibel den turismo”, Miles Mercera, CEO di CHATA ta menshoná. Di e 400 personanan ku a bishitá e evento djasabra, 329 a hasi nan promé entrevista. Huntu ku esnan ku a inskribí na SOAW/steunpunt, lo hasi un selekshon pa sigi ku e di dos buèlta di entrevista.

Turismo i sektor di hospitalidat aktualmente ta kresiendo  ku rapides i ku esaki tambe e nesesidat di hendenan kapas i dispuesto pa traha.  E kontenido di e programa ta riba nivel básiko i e planifikashon ta derivá for di e sistema di enseñansa di werkend leren.  Maestronan ku eksperensia den sektor i ademas abilidatnan didáktiko lo duna e lèsnan i tambe ta enkargá ku guia den koperashon ku empresanan. E periodo di práktika den kompania ta dura máksimo 20 siman i ta keda klousurá ku un èksamen di práktika.

‘Kla pa Turismo’ a ofresé e siguiente programanan di estudio:

  • Asistènt di kushina (kòki)
  • Asistènt di servisio
  • Asistènt di seguridat di hospitalidat
  • Housekeeping

Ta importante menshoná ku prinsipalmente e faktor di dunamentu di servisio ta unu ku a bin dilanti den tur e programanan di estudio. Ku esaki por konkluí ku ‘Kla pa Turismo’ a duna mas ku e oportunidat pa haña trabou. E evento aki ta pone e importansia di turismo den spòtlait. Mirando e desaroyonan positivo ku ta tumando lugá aktualmente den nos sektor turístiko, lo mester bai enfoká den futuro pa krea turismo komo un materia edukashonal.

Junior Chef a resultá Denverick Nicolina

Durante di e evento aki, a skohe e Junior Chef ku lo kompletá e team kulinario pa por representá Kòrsou na Taste of the Caribbean ku lo tuma lugá na Miami den 2020. Denverick Nicolina di Zest Curaçao a resultá e ganador i e di dos finalista a resultá Sharmiron Pinedo. E echo ku a hasi e kompetensia aki durante ‘Kla pa Turismo’, no ta kasualidat. Ta un bon oportunidat pa e personanan ku ta interesá pa traha den kushina, sa kiko e trabou di kòki ta enserá.

Tambe mester menshoná ku ta promé biaha den historia di Caribe, ku un kòki hoben di apenas 13 aña di edat a partisipá den e kompetensia di Junior Chef. Ta trata di Kizane Garmers ku a sa di motivá tur presente ku su gran abilidat pa kushiná, apesar di su edat.

E proyekto “Kla pa Turismo” ta parti di un Public-Private-Partnership entre CHATA, MEO, Ministerio di (SOAW) i tambe mundu empresarial. CHATA kier a yama danki na Marnix College Cas Cora i Coca Cola pa por a hasi e evento aki posibel. Pa mas informashon por bishitá www.klapaturismo.com